KALIBO, Aklan—Haeos 98 porsiyento eon nga tapos ro relocation it mga poste it kuryente sa isla it Boracay bilang kaparte it nagapadayun nga rehabilitasyon sa isla.
Suno kay Engr. Joel Martinez, assistant general manager for engineering department it Aklan Electric Cooperative (Akelco) nga umpisa kaina hay gin-pull-out eon sa isla ro andang mga personnel it gintukod nga local task force kaibahan ro ibang mga kagamitan.
Sangkiri eon lang sigon ro kinahangean nga trabahuon sa isla partikular ro may problema sa right of way ukon eugta nga pagasayluhan it andang mga poste.
Kaabuan sigon sa andang mga poste sa isla hay naapektuhan it ginpatuman nga 12-meter nga eapad it main road.
Sa pihak nga parte, ginaduso man sigon nanda sa isla ro pag-upgrade sa kapasidad it distribution lines ag power substations agud nga masabat ro ginaeauman nga pagtaas it power demand sa Boracay sa masunod nga mga dinag-on.
Ginpahayag pa ni Engr. Martinez nga umpisa nga ginbuksan ro isla halin sa 6 nga buean nga rehabilitasyon tuga it environmental problem hay nagtaas ro demand it kuryente nga halin sa 28 megawatts hay naga-abot makaron sa 31 megawatts.
Bangud kara, gina proponer nanda nga uman nga magbutang it dugang nga 13-MVA power substation sa isla agud nga makadugang sa naga-eksister nga 13-MVA Boracay sub-station ag Caticlan 10-MVA substation.
