KALIBO, Aklan–Ginakabig nga pinakamabahoe ag respetado nga rematch ro matabo sa Saitama, Japan sa adlaw it Martes, Hunyo 7 sa tunga ni WBC bantamweight champion Nonito “The Filipino Flash” Donaire ag Japanese boxing star nga si WBA, IBF champion Naoya Inoue.
Ginpahayag ni Bombo International Correspondent Josel Palma nga ro rematch it daywa ro ginahueat gid it tanan partikular it mga taga Japan.
Suno kay Palma, sambilog sa mga rason kung haman maskin ro mga Pinoy sa Japan hay pabor kay Inoue hay bangud sa pihak it batang edad kara hay kilaea eagi imaw bangud sa anang kaabtik.
Samtang, may pila man sigon nga nagpabor kay Donaire base sa eksperyensya kara pag-abot sa patag it boxing.
Sa makaron si Inoue ro may buyot it daywang korona sa IBF ag WBA.
Kumpiyansa man si Donaire nga mabawi nana sa makaron nga kahigayunan ro kagdaeag-an kontra sa kilaeang knockout artist nga si Inoue.
Mataeopangdan nga ku nagtaliwan nga 2019 hay ginkabig nga fight of the year ro andang showdown apang natigayon nga napiyerde sa unanimous decision si Donaire.
