Temporaryong nakahilway si Dasmarinas, Cavite Representative Kiko Barzaga matapos magbayad it piyansa sa waeong magkaseparado nga kasong cyberlibel, suno sa Cavite Police Provincial Office (PPO).
Base sa pulisya it Dasmariñas Component City Police Station, insigida man nga nakahilway ro kongresista bandang alas-10:25 gabi-i it Lunes, Abril 13 matapos nga boluntaryong nagsurender kasunod it ginpaguwa nga warrant of arrest it Makati City Regional Trial Court.
Nagpiyansa si Barzaga it kabilugan nga P384,000 para sa eight counts it kasong cyber libel.
Nag-ugat ro kaso it kongresista sa anang online post kun sa siin gin-akusahan nana ro negosyanteng si Enrique Razon it pagpanuhoe sigon sa mga kongresistang miyembro i t National Unity Party para suportahan ro speakership bid ni dating House Speaker Martin Romualdez sa idaeum it 20th Congress.
Nauna kara, nagpangayo it pasaylo ro kongresista sa business tycoon ko Enero 2026 matapos imaw nga pasakaan it kasong cyber libel.
Gin-aku it kongresista nga nag-ugat ro anang mga pasibangud sa personal nga kaakig ag ginhambae nga haum imaw nga batunon ro anuman nga penalidad.
