KALIBO, Aklan—Gin-anunsyo it lokal nga gobyerno it Malay nga owa it pagbag-o sa mga requirements para sa mga lokal nga turista nga magabisita sa isla it Boracay.
Bangud kara, ro negatibong RT-PCR result nga may 72 hours validity ag confirmed booking sa DOT-Accredited hotel hay magapabilin pa gihapon nga requirements.
Ginpahayag ni Malay mayor Frolibar Bautista nga nag-meeting kahapon ro Provincial Inter-Agency Task Force kung siin gintalakay nanda ro mga tikang angot sa bag-ong guidelines nga gin-aprubahan it National IATF.
Suno kana, mayorya sa mga 17 ka mga alkalde sa probinsya it Aklan ro nagpamaeabag nga duea-on ro negatibong RT-PCR result para sa mga biyahero ag turista nga nagasueod sa probinsya.
Apang, kung imaw sigon ro pagakutan-on, pabor sigon imaw nga bue-on eon ro RT-PCR test bilang requirements sa mga naga-uli sa Malay.
Nagapati sigon raya nga sarang masuk-ean ro pagkalhit it COVID-19 pinaagi sa pagsunod sa minimum health protocols.
Angot kara, magapadaea sigon sanda ni Aklan Governor Florencio Miraflores it rekomendasyon sa Boracay IATF angot sa pag-lift it RT-PCR requirements para sa mga turistang magabakasyon sa Boracay.
