Kalibo Aklan ————Nakataeanang magalunsar hin-aga adlaw it biyernes, Pebrero 11 ro gobyerno probinsiyal it Aklan it “Resbakuna sa Botika” sa City Mall sa Isla it Boracay .
Suno kay Dr. Cornelio Cuatchon, Jr. it Provincial Health Office ukon PHO-Aklan nga gin-umpisahan eon it National Government ro “Resbakuna sa Botika” sa Metro Manila ag ginpaeawig sa iba pang mga lugar sa nasyon .
Ginpili sigon it gobyerno ro mga botika nga may mga outlets sa bilog nga nasyon para sa Covid-19 vaccination program.
Kasunod kara, ro pagpatigayon it launching it pediatric vaccination ukon pagbakuna sa mga naga-edad it 5 hasta 11 anyos sa sangka hotel sa Boracay.
Ginpahayag ni Dr Cuatchon nga ro event hay pagasaksihan ni tourism secretary Bernadette Romulo-puyat, interior secretary Eduardo año ag vaccine czar secretary Carlito Galvez, Jr.
Matapos suno kana nga makabo-oe it supply it bakuna para sa mga unga , maga-dere-deretso ro bakunahan sa mainland Aklan.
Ginpamilit pa kara nga mas mayad nga pabakunahan ro nasambit nga mga edad agud nga makalikaw sa peligro nga makaangkon it grabeng baeatian tuga it COVID-19.
Kadungan kara, gin engganyo it PHO ro mga ginikanan nga tempranong magparehistro.
Ro bakuna nga himo it Pfizer suno kana nga may color orange nga vial ag manaba nga dose ro ginagamit sa nasambit nga age group.
Sa pihak nga parte, sa pangkabilugan nga vaccination rollout sa aklan, naga abot sa masobra sa 386,000 ukon 89.65% ro nakabaton it unang dose samtang ro fully vaccinated ukon nakabaton it 2nd dose hay 350,000 ukon 81.38% ag ro nakabaton it booster shot hay masobra sa 32,000 ukon 6.6% .
Apang eampas eon sigon raya sa target nga 70% it eligible population.
Makabig man sigon nga low risk eon ro probinsiya bangud sa padayun nga pagnaba it kaso it covid 19.
Posible sigon nga pagkatapos it Feb 15 hay igapaidaeum eon ro Aklan sa Alert level 2.
