KALIBO, Aklan—Nagapadayon ro rescue and retrieval operation it mga emergency responders sa Marrakesh City, Morocco bangud sa ginapahayag nga maabo pa ro natambakan it mga narumpag nga edipisyo kasunod it 6.8 magnitude nga linog nga tumama sa lugar Biyernes it gabie.
Suno kay Bombo International Correspondent Maricel De Torres, sa sueod it an-om nga dag-on nga pagtrabaho nana sa lugar hay raya pa eamang ro anang naeksperyensyahan nga mabaskog nga linog nga pumatay sa masobra 2,000 katawo ag libo-libo man ro nailistang naninahan nga ro kaeabanan hay nagapabilin sa kritikal nga kondisyon.
Eubus sigon ro andang kahadlok nga nabatyagan rason nga napabakwit sanda sa open nga lugar inoras pa ro andang ginhueat antes nga nakabalik sa baeay it anang amo bangud sa sunod-sunod nga aftershocks nga nag-uyog sa maabong lugar sa nasyon.
Nagakatueog eon ro haeos tanan nga tawo sa lugar kat tumama ro linog rason nga uwa ro mga raya nakapangaman ag natambakan it mga edipisyo ag bukon man sigon it masyadong pulido ro mga kongkretong baeay sa Morocco.
