KALIBO, Aklan–Nagapadayun makaron ro search and rescue operation it mga otoridad sa Turkey matapos ro natabo nga daywang mabaskog nga pag-uyog ko nagtaliwan nga adlaw.
Unang nabatyagan ro 7.8 magnitude nga linog bandang alas-4:00 it aga-aga sa Southeastern part it nasyon ag ginsundan it magnitude 7.6 bandang ala-1:00 it hapon sa Central part.
Suno kay Bombo International Correspondent Weng Timoteo, Vice President it Filipino Community in Turkey nga nabudlayan makaron ro rescue team sa pagsueod sa mga lugar nga naapektuhan it pag-uyog.
Raya hay bangud maabu nga mga edipisyo kaeakip ro pilang ospital nga narumpag ag karsada nga nasamad.
Dugang pa kara ro masyadong maeamig nga tyempo ag padayun nga aftershocks.
Maabu pa sigon nga mga tawo ro owa pa ma-rescue matapos matampukan it mga debris.
Sa makaron, naga-abot eon sa masobra 3,000 katawo ro namatay nga posibleng madugangan pa sa pagtaliwan it mga oras kamana man nga haeos 10,000 eon ro ninahan.
Ginasugid nga owa pa it napabalitang Overseas Filipino Worker (OFW) nga nahalitan it mabaskog nga pag-uyog.
