KALIBO, Aklan—Gindayaw ni Aklan Provincial Fire Marshall Superintendent Nazrudyn Cablayan ro mga rescuers ag volunteers nga nagbulig sa rescue ag retrieval operation sa ap-at nga katawo nga naeumos sa madaeum nga kutkot ko nagtaliwan nga adlaw it Huwebes sa Barangay Lawaan, New Washington, Aklan.
Natigayon nga mahaw-as it rescue team it Municipal ag Provincial Disaster Risk Reduction and Management Offices ag Bureau of Fire Protection ro eawas it magmaeanghud nga sanday Jodel, 47 anyos ag Rene Felizardo, 42 anyos, parehong residente it nasambit nga lugar; kamana man ro eawas it andang igkampod nga si Darwin Cuesta, 48 anyos ag Herminio Bantang nga taga-Barangay Bubog, Numancia, Aklan.
Nagbuhay it haeos ap-at nga oras ro retrieval operation.
Suno kay Cablayan ro mga rescuers hay naggamit it Self-Contained Breathing Apparatus (SCBA) agud nga mabo-oe ro mga bangkay.
Nasayuran nga ro kutkot hay may kadaeumon nga ginatantiya nga 40 piye.
Ginasugid nga magabutang kunta it submersible water pump ro mga biktima.
Sa pihak nga parte, nagapadayun ro imbestigasyon it New Washington Police Station kon ham-an nga ginhimo ro kutkut haeos sang dag-on ag tunga eon ro nagtaliwan nga kon sa siin owa raya it nagakaigo nga permits.
Ginasugid nga may minahan it bueawan sa nasambit nga lugar.
