Gintalakay sa committee hearing it natungdan nga komitiba it Sangguniang Panlalawigan it Aklan ro ginproponer nga resolusyon ni Kalibo sangguniang bayan member Ronald Marte kon sa siin nakabaehag ro anang hugot nga pagpamaeabag nga mabutangan it international flight ro Godofredo P. Ramos aiport sa Caticlan Malay.
Suno kay Marte, ginpaathag nana ro pila ka mga kabangdanan kon ham-an it sambilog imaw sa mga nagapamaeabag sa tikang nga ginhimo it San Miguel Corporation nga sanda ro nagadumaea sa nasambit nga paeoparan kon sa siin ko buean it Disyembre hay may naghugpa nga international flight maghalin sa Tapei, Taiwan.
Ginpahayag dugang nga sa anang tan-aw hay may authority ro sangguniang panlalawigan nga maghimo it tikang para inde eon madugangan pa ro international flights sa Caticlan aiport.
Mag-eowas suno kana nga apektado ro ekonomiya it banwa it Kalibo ag mga kaeapit nga banwa sa first district it probinsya hay nawad-an man it pangabuhian ro mga pumueoyo kaparehas it mga porter ag ro mga negosyo sa palibot it Kalibo International Aiport.
