MALAY, Aklan—Aprubado eon it Sangguniang Bayan it Malay ro resolusyon nga nagapabakod sa nga pagpamaeabag it mga apektadong sektor ag stakeholders sa pagpatindog it tulay nga magasugpon sa mainland Caticlan paagto sa Isla it Boracay sa ginpatigayon nga 8th regular session, adlaw it Huwebes, Marso 12, 2026.
Ro ordinansa hay gin-author ni Konsehal Hope Pagsuguiron nga ginsuportahan it anang mga kaibahan sa plenaryo.
Madumduman nga nagpaabot it pagkontra ro mga residente, katutubo, workers, private sectors, ag iba pa sa planong pagbutang it tulay bangud sa epekto kara partikular sa andang pangabuhian.
Ginakabaeak-an nga mabutang sa peligro ro coral reefs, beaches, ag marine life sa oras nga umpisahan ro pagkutkot sa dagat ag ro mabahoe nga pagkaduea sa kita it lokal nga gobyerno.
Maskin ro simbahan hay hagayan nga nagabatikos sa pagahimuon nga proyekto it sangka mabahoe nga kompaniya.
Bangud nga owa it endorsement ag pormal nga konsultasyon sa LGUs, ag pag-oponer it provincial government ag iba pang nakikisimpatya, owa pa it konkretong pag‑apruba kun hin-uno paga-umpisahan ro nasambit nga proyekto.
