KALIBO, Aklan—Gintalakay it sangguniang panlalawigan ro sueat nga ginpadaea ni Kalibo mayor Juris Sucro para sa nagakaigo nga suporta sa ginaduso nga cityhood it capital town it Aklan.
Ginhimay ni board member Apolinar Cleope sa plenaryo ro sueat ni mayor Sucro ag insigida nga gin aprubahan it provincial board ro daywang ka resolusyon angot sa andang pagtau it suporta.
Nakabaehag sa resolution ro hugut nanda nga pagsuporta sa consolidated house bill nga nagaduso nga ma-convert ro Kalibo nga siyudad nga gin author nanday representatives Eric Go-Yap, Carlito Marquez ag Rosemarie Panotes kamana man si Welter Palma ag Paul Daza.
Gusto it nasambit nga mga mamalidha nga kon owa it siyudad ro sangka probinsiya ag may sangka sentro nga banwa hay obrahon raya nga siyudad ag i-exempt sa mga qualifications.
Kaeabanan sigon nga kon maisot ro sangka capital town hay mabudlay kon amat nga maabot ro mga requirements kapareho it land area ag population nga nakabaehag sa laye.
