Aprubado eon it Sangguniang Panlalawigan it Aklan ro resolution nga ginpresentar sa plenaryo bilang pagsuporta sa House bill Number 06401 nga gindihon ni Aklan 2nd District Congressman Teodorico Hareso para maging component city ro banwa it Malay.
Ginpadasig ro pag-apruba sa resolusyon bangud nga igasalang eon raya makaron nga adlaw sa Committee on Local Government sa 19th Congress it House of the Representatives bilang sambilog sa andang mga pagatalakayon nga hagna.
Nauna eon nga ginpahayag it mga SP Aklan officials nga kwalipikado ro Malay para maging syudad it probinsya bangud nga naabot kara ro pilang minimum requirement sa idaeom it Local Government Code partikular eon pag-abot sa land area, populasyon ag income.
Nasayuran nga sakop it Malay ro isla it Boracay nga nagata-o it mabahoe nga income sa provincial government.
Mabahoe nga development ag maabong benipisyo sigon para sa probinsya it Aklan nga maging syudad ro banwa it Malay.
