KALIBO, Aklan – – – Umalma ro sangka business establishment sa isla it Boracay matapos nga kaeakip sa gihapon ro pangaean it andang resort sa listahan it Department of Environment and Natural Resources (DENR) nga nakitaan it pag eabag sa sewerage system.
Suno sa sangka staff it resort, na-comply eon nanda ro mandu it DENR nga magkonekta sa linya it Boracay Island Water Company (BIWC) agud makaangkon it proper treatment it sewage ukon waste disposal.
Gin hayag pa kara nga inisyuhan eon sanda it certification maghalin sa BIWC nga pamatuod nga sumunod sanda sa gin mandu nga sambilog sa mga requirements sa environmental law agud maisyuhan it permit.
Gin kakibot sigon nanda nga matapos ibulgar nga sambilog ro andang resort sa 11 nga business establishments nga positibong gin tumod nga nakahimo it bayolasyon.
Madumduman nga sa gin patigayung Boracay Stakeholders Meeting ku adlaw it Miyerkules, sambilog ro nasambitang resort sa 11 violators nga gin presentar pinaagi sa powerpoint presentation.
