Sangka ramen restaurant sa Tokyo ro ginbawaean ro andang mga customer nga maggamit it cell phone samtang nga nagakaon.
Ko ulihing domingo it Marso, nagdesisyon si Kota Kai, tag-ana it ramen restaurant nga “Debu-chan” nga hambaean ro andang mga customer nga punduhon eon ro paggamit it cell phone samtang nga nagakaon.
Suno sa obserbasyon ni Kai sa anang mga customer, nataeupangdan nana nga ro pinakamabuhay makatapos magkaon hay ro mga nagagamit it cell phone para magtan-aw it Youtube.
Maisot eamang ro puwesto it Debu-Chan sa Takadanobaba, Shinjuku district ag masarangan eamang kara nga magbaton it 33 customers.
Kada peak hours, nakakaangkon it mahabang pila sa guwa it restaurant ag mas nga nagabuhay ro paghueat it mga nakapila kon may naga-cell phone samtang nga nagakaon.
Mag-eowas kara, ro sambilog pang rason ham-an nga ginbawae ro paggamit it cell phone hay agud nga mapabilin ro quality it gina-serve nga ramen.
Hakata ramen ro gina-serve sa Debu-Chan.
Manipis ro noodles it Hakata ramen ag kinahangean raya nga kaunon eagi agud nga mapabilin ro texture.
Kon magbuhay ag nababad raya sa mainit nga sabaw, indi eon raya magiging kasing nami kon bag-ong serve.
Maskin nga presenteng ginapatuman eon ro nasambit nga sueundanan, owa it makitang maskin ano nga signage angot sa pagbawal it paggamit it cell phone sa restaurant.
Raya hay bangud nga gusto ni Kai nga personal nana nga istoryahon ro kada customer nga magagamit it cell phone.
