KALIBO, Aklan — Proud ro sangka retiradong principal sa anang pagiging embalsamador .
Suno kay Mrs. Remia Donguines nga ro pagtrabaho sa patay hay nabugtawan eon nana umpisa nga unga pa imaw bangud ro anang ama hay nagatrabaho sa sangka funeral parlor.
Ginpahayag dugang nga samtang nagaturo kato sa sangka pampublikong eskwelahan hasta nga naging principal ko ulihi hay nagatrabaho man imaw bilang sangka licensed embalmer sa punerarya nga ginapanag-iyahan it anang pamilya.
Ginsaysay pa ni Mrs. Donguines nga negosyo eon it andang pamilya ro pagpadaeagan it punerarya kun sa siin hay ginturo raya kana it anang ama.
Gina-praktis sigon nanda nga antes nga gina-embalsamo ro patay hay ginapataliwan anay ro 24 oras .
Bilang kilaeang nagapanag-iya it sambilog sa mga mabuhay eon nga funeral parlor sa Aklan hay naexperiensiyahan sigon nana nga gin-aywan sa guwa it anang eskwelahan sa may garden ro tatlong bangkay it eapsag sa magkaseparado nga kahigayunan nga may naka-ungot pa nga pusod.
Nasaksihan man sigon nana ro pag-responde sa plane crash sa sangka lugar sa katung-anan it banwa it Madalag ag Libacao, kun sa siin hay gintililipon nanda ro mga nagkagutay-gutay nga eawas it maabu nga mga pasahero ag ginsueod sa buli nga sako.
Kasunod kara hay nagdamgo sigon imaw nga may mga tawo nga nagahilira nga nagasaka sa andang baeay ag matsa nagapangayo kana it bulig .
Bangud kara, ginpa-bendisyunan sigon nanda ro tanan nga patay antes nga ginpadaea sa andang natungdan nga mga lugar.
Sa pihak nga parte, ginpahayag pa ni Mrs. Donguines nga kada fiesta minatay hay owa nanda ginakalipatan nga magbutang it kandila sa andang morgue ag sa punerarya mismo kamana man ro paghaead kanda it pangamuyo.
