Confined sa Provincial Hospital ro sangka 49-anyos nga eaeaki matapos nga makaangkon it tama it baril bandang alas-5 kahapon it pang-orason sa may bahin it Brgy. Cawangyan sa banwa it Makato.
Suno sa biktima nga ginkilaea kay Rafael Tambong ag residente it nasambit nga lugar nga samtang nagabaktas imaw hay nag-abot ro suspek sakay it anang motorsiklo ag gulpi eamang sigon imaw nga ginbaril.
Nasayuran nga sangka retired pulis ro suspek nga ginkilaea kay PSsgt. Dennis Tordicillas ag sa idaeom it makahieilong nga ilimnon tag natabo ro insidente.
Base man sa bersiyon it suspek nga owa nana ginbaril si Tambong apang gulpi eamang sigon karang gin-agaw ro anang calibre 45 nga baril.
Nakaangkon ro biktima it tama sa may waeang porsyon it anang tuhod rason nga insigida rayang gindaea sa ospital.
Sa makaron, sa paghinakop eon it Makato Municipal Police Station ro suspek para sa nagakaigo nga disposisyon.
