Gin-inspection it Department of Interior and Local Government ukon DILG ro Aklan river nga sakop it Sitio Kaarumahan, Brgy. Bakhaw Norte, Kalibo.
Raya hay kasunod sa posibilidad nga maumpisahan eon ro proyekto nga revetment wall nga may pondong kapin sa P50 milyon pesos.
Suno kay Kagawad Freddie Andrade it nasambit nga lugar, delikado eon ro mga panimaeay sa binit it suba bangud nga may posibilidad eon raya nga mahueog may pilang baha pa ro umagi.
Sigidas sigon ro pagkatimpa it eogta ag kapin sa waeong ka baeay ro nagapameligro nga mahueog kon inde pa mabutangan it revetment wall.
Angot kara, ginsuhestyon sigon it Kalibo mayor Juris Sucro nga kapin sa 12 metros ro daeom it pagkaeobong it anang pundasyon agud nga masiuguro ro kapag-unan it proyekto bangud nga sueog it tubi ro kontra sa nasambit nga lugar.
Sa pihak kara, ginpasaeamatan it barangay council nga may resulta eon ro mabuhay eon nanda nga hinyo para inde eubusan nga maab-ab it tubi ro propyedad it mga residente.
Posible sigon nga inde eon mag-agi pa sa bidding process ro proyekto apang uwa pa sigon it ginpaguwa nga pinal nga statement ro DILG ag ro natungdan nga ahensya it gobyerno nga magadumaea sa nasambit nga proyekto
