Ginakabaeak-an nga base daeayon nga masamad ag mahugos ro revetment wall sa may Sitio Guba Brgy. Tigayon, Kalibo nga proyekto it Department of Public Works and Highways ukon DPWH region VI.
Suno kay Punong Barangay Gil Morandante nga insigida sanda nga nagpadaea it sueat sa nasambit nga ahensya it gobyerno agud nga maayos ro nasambit nga proyekto nga may pondong umabot sa P104 milyon pesos.
Nakaistorya eon sigon sanda it project engineer nga si Engr. Juvy Delgado kon sa siin ginpasiguro kara nga anda nga pagaayuson ro revetment wall bangud nga sigidas raya nga ginaab-ab it tubi eabi eon kon nagabaha-baha sa Aklan river.
Ginpahayag dugang ni kapitan Morandante nga pagkataeopangod nanda sa nasambit nga problema hay gilayon nanda raya nga gin-aksyunan agud nga mapaabot sa natungdan nga ahensya it gobyerno bangud sa nagakanugon sanda sa nasambit nga proyekto para sa andang barangay.
