KALIBO, Aklan—Suspendihon ro Rice Liberalization Law ag ibalik sa National Food Authority ukon NFA ro kontrol sa importasyon it bugas.
Raya ro naging suhestyon ni Mr. Elmer Forro, secretary general it Bagong Alyansang Makabayan ukon Bayan Panay kasunod it pag-apruba ni Pangueong Ferdinand Marcos Jr. sa pagtaeana it mandatory price ceilings sa bugas sa bilog nasyon.
Suno kana, bukon gihapon it makatarungan ro price ceiling para sa regular milled rice nga sa P41.00 pesos kada kilo samtang ro well-milled rice hay kapin sa P45.00 pesos ro kada kilo bangud nga inde gihapon raya masarangan it kubos nga mga pumueoyo.
Ro nagaganar gihapon sigon hay ro mga gamhanang negosyante bangud sa sunod-sunod ro importasyon sa ibang nasyon.
Kon taw-an eamang suno kana it husto nga igtaeopangod ro sektor it agrikultura hay mapaabo ro lokal nga produksyon it paeay agud nga mapanaba ro presyo it bugas.
Nauna eon nga ginpirmahan ni Pangueong Marcos ro Executive Order No. 39 nga pirmado ni Executive Secretary Lucas Bersamin matapos ginrekumenda it Department of Agriculture and Department of Trade and Industry nga makaangkon it price ceilings sa bugas.
Magiging epektibo ag magapabilin ro price ceilings sa bugas hasta nga uwa raya ginakakas ukon ginabawi it Presidente.
