Kalibo Aklan———-Bali ro tuo nga siki ag nakaangkon pa it pilang ka mga gasgas sa kaeawasan ro sangka motorcycle driver matapos nga aksidenteng makabunggo sa sangka pick up sa may bahin it Enriquez road, Barangay Estancia, Kalibo.
Ro owa pa makilaea nga biktima hay nakasakay sa anang TMX Honda motorcycle nga kulay puea ag ginapahayag nga residente it banwa it Lezo.
Samtang ro pick up hay ginamaneho ni Hope Sodusta ag residente it Barangay Tigayon, Kalibo.
Suno sa sambilog sa mga nakasaksi sa aksidente nga si Arman Cortez ag sambilog sa mga nagbulig sa biktima nga antes ro hitabo hay naghana sigon nga mag-overtake ro driver it motorsiklo sa kasunod karang tricylce ag owa kara napan-unahan ro pagguwa it pick up ag aksidente nana rayang nabungguan.
Naigpit man sigon it pick up ro siki it biktima ag nabali gid raya samtang natumok man ro pilang parte it anang ginamanehong motorsiklo.
Sa pihak nga parte, ginpahayag man it driver it pick up nga si Hope Sodusta nga nagapaguwa eun imaw it Enriquez road ag maga-uli kungta sa andang baeay kat natabo ro aksidente.
Nauna kara hay nakit-an sigon nana ro mga saeakyan sa anang prenti nga nagpundo ag nagtao kana it daean rason nga nagderi-deritso imaw.
Apang gulpi eamang sigon nga eumusot ag gin-unahan it driver it motorsiklo ro mga saeakyan sa anang prenti ag dikato eun kat bumunggo raya sa pick up.
Sa pihak kara , ginpahayag ni Sodusta nga maskin nga owa imaw it saea hay haom raya nga buligan ro driver it motorsiklo sa magiging gaeaastuson kara sa hospital.
Sa makarun hay ginpakamayad it MDRRMO- Kalibo nga daehon sa ospital ro biktima para sa nagakaigo nga pagbueong.
