KALIBO, Aklan—Ginpaathag it sangka kilaeang abogado sa Aklan nga ro ginatawag nga “right to asylum” hay ro kinamatarung it sangka indibidwal ukon grupo it mga indibidwal nga gina-persecute it kaugalingon nga nasyon.
Suno kay Atty. John Mar Barrios nga ro mga indibidwal nga nakaka-experiensiya it seryosong paeag sa andang nasyon hay may kinamatarung nga magpangayo it international protection.
Raya hay angot sa pag-aplay it political asylum ni suspended Negros Oriental Representative Arnolfo “Arnie” Teves sa Timor-Leste nga gina alegar nga ginpamalibaran man it nasambit nga nasyon.
Sa baylo, ginataw-an imaw it nasambit nga nasyon it limang adlaw agud nga maghalin sa andang nasyon.
Gindugang pa ni Atty. Barrios nga gusto ni Teves nga madeklara imaw nga refugee sa ground nga gina persecute imaw it Pilipinas.
Madumduman nga ginadaeahig si Teves sa pagpatay kay Negros Oriental Governor Roel Degamo, ag waeong iba pa.
Hugut man nga ginapamalibaran it kongresista ro pasibangud.
Nauna eon nga ginpahayag it DFA nga nakabaton sanda it impormasyon halin sa Philippine Embassy sa Timor-Leste nga idtu sa Dili si Teves kun sa siin nagsumite imaw it aplikasyon para sa political asylum.
Para kay Atty. Barrios, ro nasambit nga tikang ni Teves hay bukon it aplikable kana bangud nga owa man imaw gina-pre-judge sa natabu kundi nga ginataw-an it tyansa nga makasabat.
Ro pagdeklara man suno kana nga terorista hay sandig sa laye.
Mag-eowas sa political asylum, pwede man nga maging refugee ukon magpanago sa ibang nasyon ro gina-persecute bangud sa religion, race ukon nationality discrimination ag iba pa.
