May opisyal eun nga kanta ro sikat ngas baby pygmy hippo it Thailand nga si Moo Deng.
Ro 50-segundong kanta nga “Moodeng Moodeng” hay available sa Thai, English, Chinese, ag Japanese.
Tampok sa kanta ro masadya nga liriko kapareho it “Moo Deng Moo Deng, boing boing boing / Mommy mommy, play with me.”
Kaibahan sa music video ro malip-ot nga clips it baby hippo nga nagaba-bounce, nagahampang kaibahan ro anang mga tagapag-alaga, o nakikipag-bonding sa anang ina nga Jona.
Ro catchy nga kanta hay himo ni Mueanphet Ammara, sangka kilaeang composer sa Thailand, ag ginpaguwa it GMM Music, sambilog sa mga pinakamabahoe nga music company it nasyon.
Ro pangaean nga Moo Deng, hay literal nga nagakahueogan it “bouncy pork” o sangka klase it meatball sa Thai, hay naging kilaea sa bilog nga kalibutan matapos imaw ipakilaea sa Facebook it Khao Kheow Open Zoo sa Chon Buri province ku nagtaliwan nga buean.
Suno sa mga fans, ro anang pangaean hay bagay sa anang masiglang personalidad.
Mahilig umindayog ag mag-bounce si Moo Deng, nga naging viral eun sa social media paagi sa maabong mga memes.
Makaron ap-at nga buean eun ro baby hippo ag ginadayo it linibo nga bisita sa zoo nga daywang oras ro byahe halin sa Bangkok.
Suno sa zoo, nagaaabot sa 3,000 hasta sa 5,000 bisita ro nagasueod kada adlaw sa nagtaliwan nga buean.
Nagabaligya man sanda it nagkaeain-eain nga produkto kapareho it eambong, haboe ag iba pa nga merchandise nga may disenyong inspirasyon ni Moo Deng.
Suno kay Zoo Director Narongwit Chodchoi, ro nagataas nga kita halin kay Moo Deng hay nagasuporta sa breeding programs para sa mga endangered species kapareho it pygmy hippopotamus, nga delikado bangud sa poaching ag pagkasamad it andang habitat.
Ro Khao Kheow Open Zoo hay may eapad nga 800 ektarya (halos 2,000 acres) ag baeay sa 2,000 kasapatan.
Ro pygmy hippopotamus hay native sa West Africa, ag ginabueabanta nga 2,000-3,000 eun lamang ro habilin nga buhi sa wild.
