Ginagamit eon ro bag-ong P1,000 peso bills nga obra sa polymer.
Dati, obra sa abaca fiber ro P1,000 peso bills ag ro iba pang paper bills apang makaron hay kaibahan eon ro Pilipinas sa nagagamit it kwartang obra sa polymer.
Si dating Central Bank governor ag makaron hay Finance Secretary Benjamin Diokno ro nagdesisyon nga maggamit it polymer ro nasyon.
Apang maabu nga pangutana ro nagguwa matapos ga i-release ro P1,000 peso bills ko nagtaliwan nga domingo ag hasta makaron, raya gihapon ro mainit nga gina-istoryahan.
Ginasugid nga indi dapat nga pilu-on ro P1,000 pesos nga polymer bangud nga raya hay masamad.
Kinahangean hay plantsado sa wallet.
Indi sigon dapat nga mainitan bangud nga magakupas ro anang kolor ag iba pang imprinta.
Maabu pa nga pangutana sa bag-ong P1,000 peso bill.
Apang ro pinaka-importanteng pangutana hay kon ham-an nga kinahangean pa nga bayluhan it agila ro tatlong baganihan it World War 2.
Ro tatlong baganihan hay sanday Josefa Llanes Escoda, Jose Abad Santos ag Vicente Lim.
Ginpahayag ni Diokno nga owa man ginabalewala ro kabaganihan it tatlo.
Kalakaran eon man sigon makaron ro pagbutang it fauna ag flora sa kwarta.
Apang kunta hay owa eon ginduea ro tatlong baganihan it World War II.
Puwede man nga ibutang ro Philippine eagle sa P1,000 peso bill nga indi masakripisyo ro mga baganihan.
Indi dapat nga boe-on ro mga nagsakripisyo it kabuhi para sa nasyon.
