KALIBO, Aklan—Magapadayon ro road clearing operation sa tanan nga karsadahon maghalin sa barangay road hasta sa national highway.
Suno kay Department of Interior and Local Government (DILG)-Aklan Engr. Carmelo Orbista, sandig sa memorandum circular number 2020-027, ginataw-an it corresponding rules ro tanan nga local executives halin sa provincial governor hasta sa mga punong barangay.
Ginpahayag dugang nga continuation eamang raya it nauna nga memorandum circular number 2019-121 kon sa siin kat uwa makapasa nga mga munisipyo sa violation hay gintaw-an it DILG it kahigayunan nga makapaathag.
Ro katuyuan kara hay mamintina nga mahawan ro mga karsadahon ag eowas sa tanan nga illegal ag unauthorized obstruction kaeakip sa sidewalks.
Nasayuran nga ginadumilian ro pagbuead it paeay sa mga karsadahon, pagbutang it mga structures ag iba pang bagay nga makata-o it sagabal sa mga nagapanguna nga daeanon.
Samtang sa pihak nga parte, ginmanduan eon it DILG ro mga local government units nga magkriar it andang tricycle task force kasunod sa pagbawae it mga tricycle sa national highway.
Suno kay Engr. Orbista, ro andang rule hay ro pagkriar it schematic map, raya hay ro mapa it karsada nga pagaagyan it mga tricycle.
Iga-identify sigon nanda ro mga tricycle terminals nga authorize it LGU.
Ro task force man suno kana ro magapatigayon it mga public hearings sa paghimo it route plan agud masiguro nga inde eon ro mga raya mag-agi sa national highway.
