Haum baea kamo nga makaangkon it kaibahan sa trabaho ukon sa baeay nga sangka robot nga magiging kabulig mo sa mga oeobrahon.
Raya hay matapos nga ginaplano makaron ni Tesla CEO Elon Musk nga mag-obra it maabu nga mga humanoid robots sa masunod nga mga paniempo.
Ro paga-obrahon nga mga robot hay makasarang nga maging yaya, hardinero, caregiver, ukon factory workers.
Gintawag nana nga “Optimus” ro prototype it robot.
Ginasugid nga ro presyo kara hay mas manaba sa presyo it saeakyan.
Apang, aminado man ro futuristic nga negosyante nga maabu pang kinahangean nga ayuson sa robot.
Igapaidaeum pa sa mga test ro prototype para makita ro response kara sa mga owa ginaeauman nga hitabu.
Nauna eon nga ginpakita sa sangka video ro experimental test robot nga gin-obra it Tesla ko Pebrero nga nagatikang ag naga-obra it mga simpleng oeobrahon kapareho it pagdilig, naghakwat it kahon ag saesaeon.
Ginasugid nga planong ibaligya ro mga robot sa balor nga indi magasobra sa $20,000 dollars ukon masobra sa P1.1 milyon pesos.
