KALIBO, Aklan – Aminado si Ric Bryant Sarabia Nicolas nga komplikado ag malisod ro robotics apang raya hay anang na-eenjoy.
Raya man ro naging daean agud nga sambilog imaw sa mga magdaog sa National Robotics Champions nga ginhiwat ku Mayo 2024 sa may bahin it Cebu nga may mga special awards kapareho it Young Engineer, Young Innovator ag Outstanding Team Engineer.
Sa pakikipag-angot kana it Bombo Radyo anang ginpakigbahin nga raya hay anang kinahiligan sa bulig man it anang mga manugturo ag inspirasyon man nana ro anang bilog nga pamilya.
Bangud sa nasambit nga kadaeag-an hay gintaw-an sanda it sertipiko nag medalya sa kompetisyon ag pag-uli nanda hay ginrekognisa man it Sangguniang Panlalawigan it Aklan.
Pahayag man ni Nicolas nga raya hay bahin it andang lessons ukon aktibidades sa eskwelahan.
Laygay man nana sa mga pamatan-on kapareho nana nga magpadayon eamang sa andang mga handum.
Sa makaron, plano man nanda nga mag-intra sa mga paeabuton nga international competitions makaron nga dag-on.
