BALITANG Espesyal — Sangka 95-anyos nga mangunguma sa United Kingdom ro indi makapati kat maibalik kana ro naduea nana nga Rolex watch makataliwan ro 50 anyos!
Ko 1950, ginregaluhan ni James Steele ro anang kaugalingon it Rolex watch para sa anang 21st birthday.
Napuslan nana raya it maeawig nga paniempo apang makataliwan ro 20 anyos, naduea nana samtang nagatrabaho sa anang bukid sa Shropshire, England.
Mabahoe ro anang pagpati nga nahueog raya sa anang alima samtang nga nagapakaon it mga alagang baka.
Kat indi makita hay gin-eaum nana nga ginkaon raya it anang mga baka.
Makaron nga 2024, nagpaeapit ro metal detectorist nga si Liam King sa apo ni Steele ag nagpangayo raya it permiso nga mag-treasure hunt sa andang bukid.
Ginpasugtan nana raya ag sa anang bulig hay nausoy ro Rolex watch ni Steele.
Owa eon naga-andar ro relo ag ro leather bracelet kara hay naduea eon.
Apang ro daeayawon sa brand it relo hay sangkiri eamang raya nga nakaangkon it tuktok.
Owa eon it plano nga ipaayos raya ni Steele sa pagkabaeaka nga mas mahae ro anang magastos sa repair kara.
Ro gusto eon lang nana hay idisplay raya bilang remembrance.
