Igapagguwa eon sigon it Department of Health (DOH) sa andang website ro mga lugar sa National Capital Region (NCR) kung siin igapatuman ro pilot implementation it second booster dose ag posible raya nga adtunan it mga pumueoyo.
Una kara ginpahayag it DOH nga sa adlaw it Lunes hay paga-umpisahan eon it gobyerno ro pagturok it second booster shot ukon ika-ap-at nga dose it COVID-19 vaccine.
Apang, ro mga Pinoy haum eon baea sa pagpaturok it ikaywang booster shot?
Padumdom it Vaccine Expert Panel nga mas strikto makaron ro pagtao it bakuna bangud ro mga immunocompromised hay kinahang-ean eon nga magbuoe it medical certificate antes sanda maturukan it COVID vaccine.
Kaibahan sa requirements ro pagdaea it original nga vaccination cards ag ID.
Ginpahayag it DOH, pagatalakayon pa it Health Technology Assessment Council (HTAC) ag Vaccine Expert Panel ro pagpaeawig it pagtao it second booster dose sa mga senior citizen ag health frontliners.
Ginpasiguro man it gobyerno ro kaeuwasan it mga bakuna antes ro pagtao it second booster dose bangud sa idaeom pa gihapon it Emergency Used Authorization (EUA) ro mga raya.
