Nagapadayun ro rollout it Expanded Unified Package for Livelihoods, Industry, Food, and Transport ukon UPLIFT Program sa Western Visayas bilang kaparte it programa it administrasyon ni Pangueong Ferdinand Marcos Jr. agud nga magtau it dugang nga ayuda sa mga pamilyang naapektuhan it padayun nga pagtaas it presyo it langis.
Suno kay Therese Fely Legaste, tagapaghambae it Department of Social Welfare and Development (DSWD) Region 6 gin-umpisahan eon ro pagpanupod it ayuda sa nagkaeain-eain nga parte it Aklan, Antique, Capiz, Guimaras, Iloilo, ag Iloilo City.
Dugang pa nga ginaboeobanta nga naga-abot sa masobra sa 7.5 milyong kabaeayan ukon kapin sa 37.5 milyong Pilipino sa bilog nga nasyon ro ginaeauman nga magapanipueos sa programa.
Sa idaeum it Expanded UPLIFT, makabaton it sang beses nga cash assistance nga hasta sa P2,000 ro 3.5 milyong benepisyaryo it Pantawid Pamilyang Pilipino Program (4Ps) at Walang Gutom Program.
Samtang, ro 2.5 milyong pigado ag near-poor nga pamilya nga nakalista sa 2024 Community-Based Monitoring System (CBMS), kamana man ro 1.5 milyong low-income workers ag andang mga pamilya nga beripikado sa database it Social Security System (SSS), hay makabaton it P2,000 kada buean umpisa makaron nga Hulyo hasta Disyembre ukon may kabilugan nga P12,000.
Gin-abisuhan kara ro mga benepisyaryo nga makipag-angot sa andang natungdan nga lokal nga gobyerno para sa schedule it andang pay-out.
