KALIBO, Aklan — Padayun nga igasueong ni re-elected Sangguniang Panlalawigan member Nemesio Neron ro mandatory Reserve Officer Training Corps (ROTC) sa provincial board.
Sa interview it Bombo Radyo, ginpahayag ni Neron nga importante nga may reserved forces ro Armed Forces of the Philippines agud nga magamit engkaso nga makaangkon it giyera ag bilang pagpahaum kontra sa ibang nasyon nga nagaplano nga magsakop sa Pilipinas .
Ginhalimbawa kara ro nasyong Israel nga maskin nga maisot nga nasyon ag ginalibutan it mga nasyon nga paeag sa andang seguridad hay haum ro mga pumueuyu kara mapa-eaeaki man ukon babaye nga depensahan ro andang nasyon.
Gindugang pa ni Neron nga makabulig man ro ROTC agud nga makaangkon it disiplina ro mga pamatan-on ag makalikaw sa bisyo kamana man sa mga naga-engganyo kanda nga makawaeang grupo .
Makabulig man sigon raya agud nga mahubog nga maging lider ro mga pamatan-on ag maging haum sa anuman nga kalamidad .
Sa pihak kara, ginsuhestiyon ni Neron nga dapat nga mga de-kalibre nga opisyal ro mabutang agud nga masiguro nga owa it record it corruption ag pagmaltrato samtang nga nagaserbisyo sa AFP.
Nasayuran nga sa idaeum it House Bill 8961, igapaidaeum sa ROTC ro mga estudyanteng una sa grade 11 ag 12 nga maga-umpisa makaron nga 2019.
