KALIBO, Aklan — Naka-ibahan eon it sangka overseas Filipino worker (OFW) nga ginmaltrato it amo sa Kuwait ro anang daywang unga sa bulig it Bombo Radyo Kalibo.
Nagbisita sa broadcast center it Bombo Kalibo ro OFW nga si Marylyn Angor it Brgy. Tigayon, Kalibo, Aklan kaibahan ro anang daywang ka unga nga babaye nga puro mga menor de edad agud nga ipaabot ro andang eubus nga pagpasaeamat matapos nga eowas raya nga naka-uli.
Naging emosyunal si Angor bangud sa kaabuon sigon it mga runaway OFWs sa shelter it Philippine Overseas Labor Office (POLO) sa Kuwait hay insigida imaw nga ginsaylo sa shelter it Public Authority for Manpower (PAM) rason nga naging madasig ro pagproseso it anang pag-uli.
Ginpahayag pa kara nga umpisa nga makipagbueag sa asawa, nakipagsapalaran imaw sa ibang nasyon bilang domestic helper para mataw-an it mas mayad nga kabuhi ro anang mga unga.
Pero pag-antus ro anang gindangatan sa anang amo bangud sa ginahimo nga pagsakit kana, kun sa siin, may kahigayunan nga gin-eapog imaw it kutsilyo ag maswerteng owa tinamaan.
Kaibahan sa anang ginpasaeamatan si Mr. Jack Arroyo it Overseas Workers Welfare Administration (OWWA)-Region 6 ag sangka Joylyn Francisco nga taga-Iloilo nga sangka OFW man nga imaw ro pirmeng nakikipag-angot sa Bombo Kalibo.
Ginhinyu man nana nga makaangkon it scholarship ro mga unga ag livelihood assistance para kana.
