KALIBO, Aklan— Nasalisihan it sangka cellphone ag kapin sa P20,000 nga cash ro sangka Russian national samtang nagapaligos sa dagat sa Sitio Angol, Brgy. Manoc-manoc sa Isla it Boracay.
Ginkilaea ro biktimang si Valentina Babenko, 37, taga-Russia ag presenteng nagabakasyon sa sikat nga isla.
Base sa insiyal nga imbestigasyon it Malay Police Station, gin-aywanan sigon it turista ro anang silver purse sa binit it baybayon antes raya nga nagpaligos sa dagat kaibahan ro anang onga.
Samtang nagapaligos hay nataeopangdan sigon kara nga may sangka nakakaeong eaeaki ro nagpaeapit sa andang gamit, gilayon raya nga ginpueot ag nagkaripas it daeagan.
Ginhana pa nga eagson it tursita ro suspek apang madasig raya nga nakapaeagyo.
Sa makaron hay nagapadayon pa ro imbestigasyon it pulisya sa nasambitang insidente.
