NATIONAL News — Ginpasiguro ni Pangueong Ferdinand Marcos Jr. nga pagapasabton nana ro sin-o man nga may kaangtanan sa retrofitting it Cabagan – Santa Maria Bridge sa Isabela kun mapamatud-an nga nakaangkon kara it korapsyon.
Dugang pa nga ginpahayag ni Presidential Communications Office Undersecretary Claire Castro nga magalunsar it imbestigasyon angot sa pagkahugos it nasambit nga tulay.
Suno kana nga maskin nga naglunsar eon it imbestigasyon ro Department of Public Works and Highways (DPWH) sa insidente, raya hay bukon sigon it ordinaryong kaso ag dapat nga matumod ro mga ebidensya para kara.
Ginpamilit pa ni Castro nga dapat hay maid-id nga gin-usisa it lokal nga gobyerno ro kondisyon it mga establisyimento ag imprastrukrua bangud nga indi raya mahimo nga tigsambilugon it Pangueo.
“Hindi po trabaho ng Pangulo iyan, trabaho na po iyan ng local at kung may problema, saka kayo makipag-coordinate sa DPWH hindi po ba?”
Sa report, nag-umpisa ro konstruksyon it tulay ko Nobyembre 2014 ag nakumpleto ko Pebrero 1, 2025 sa balor nga P1.2 bilyon.
