KALIBO, Aklan—Kapin sa 31 ka mga violators ro nairecord it Aklan Police Provincial Office (APPO) kasunod it pagtapos it Comelec gun ban ko Hunyo 8.
Suno kay PLt.Col. Norlan Perante, chief provincial operation management unit it APPO nga sa nasambit nga numero, 21 ro nadakpan it deadly weapon ag napueo ro naboe-an it firearms.
Ginpahayag dugang nga uwa it nadakpan pinaagi sa mga ginpatigayon nga comelec checkpoint kundi tanan hay mga insidente nga ginrespondehan it pulisya.
Ro nasambit nga mga indibidwal nga nadakpan hay napasakaan it kasong pag-eabag sa Illegal Possession of Firearms ag Illegal Possession of Deadly Weapons in relation to Comelec Gun Ban.
Apang, ro nasambit nga kaso hay makabig man nga pyansado.
Suno pa kay PLt.Col. Perante, ro mga nakumpiska nga armas hay loose firearms ukon owa it nagakaigo nga dokumento nga ginahuptan it mga sibilyan.
Nasayuran nga sa pagtapos it election period, pwede eon nga bitbiton sa guwa it baeay ro mga lisensiyadong armas ukon may permit to carry outside residence.
