Imbes nga makaangkon it kaklaruhan, medyu mas maabu pa ro pangutana sa kasong may kaangtanan sa pagpatay sa brodkaster nga si Percy Lapid.
Okey eon kunta kat nagsurender ro nag aku nga gunman it brodkaster ag sambilog sa mabakod kara nga ebidensya hay ro anang daea nga baril nga gingamit sa pagpatay kay Percy.
Nag-match man raya suno sa Philippine National Police (PNP) sa slug nga nabo-oe sa crime scene.
Nagpatigayon pa it walkthrough sa crime scene ro pulisya kaibahan ro nagsurender nga gunman ag igmanghud ni Percy nga si Roy Mabasa.
Maskin nga bukon pa it syento porsiyento nga pagkakumbinsido, nagapati sigon si Mabasa nga bukon it ‘fall guy’ ro nagsurender nga si Joel Escorial.
Ginatun-an eon lang kon pwede raya nga makasueod sa witness protection program (WPP) it DOJ.
Matapos nga magsurender ni Escorial, gin-insister nga matutukan eon ro middleman nga suno kana hay sa sueod it Bilibid.
Raya sigon ro nagabayad kanda agud nga ‘trabahuhon’ ro broadcaster kabaylo it mabahoe nga kantidad.
Manami eon kunta ro daeagan it kaso hasta nga ginkumpirma ko nagtaliwan nga domingo ni Justice Sec. Jesus Crispin Remulla nga patay eon sigon ro ginasugid nga middleman nga nagpatrabaho sa grupo ni Escorial kato pang oktubre 18 sa sueod it Bilibid.
Maskin nga owa namitlang it mga awtoridad ro pangaean it middleman, gintumod raya ni Escorial nga sangka alyas Idoy, 42 anyos.
Nakakulong raya bangud sa ilegal drugs.
Basi nga eubusan eon nga indi makilaea ag matumod ro mastermind sa krimen.
Ginasugid nga nabudlayan nga magginhawa ro middleman ag namatay sa Bilibid Hospital.
Bukon pa it klaru makaron kon ano ro motibo sa pagpatay kay Lapid.
Posibleng magpatigayon it ‘money trail’ kun siin naghalin ro kwarta nga gindeposito sa banko nga ginbayad kanday Escorial.
Posibleng makabulig raya sa pagtumod sa utok sa krimen.
Ro mga sabat sa mga pangutana ro aton nga paga-abangan.
