KALIBO, Aklan—Sa pihak it pagbawae it gobyerno, padayun gihapon ro pagselebrar it Paskwa sa China.
Suno kay Bombo International Correspondent Antet Meren nga masami nga naga-greet eamang ro mga tawo sa andang pamilya ag paryente sa adlaw it Paskwa.
Owa eon sigon it ginapatigayun nga selebrasyon ro mga Chinese kapareho it ginahimo sa Pilipinas.
Sa makaron hay owa eon haeos it makita nga dekorasyon sa mga daeanon bangud sa pagbawae it gobyerno.
Apang, ro mga learning institution, mall ag restaurant nagbutang it mga dekorasyon para padayun nga mabatyagan ro Paskwa.
Bilang sangka manugturo, ginatur-an man sigon nanda ro mga estudyante kun paano gina-selebrar ro Paskwa ag kun ano ro importansya kara.
Ro mga Filipino community suno kana hay nagapatigayun it Christmas party ag saeo-saeo kada Christmas eve.
Sa pihak kara, padayun gihapon ro andang pagsueod sa trabaho bangud owa ginakabig nga holiday it Chinese government ro Disyembre 25 kamana man nga owa sanda it ginaeauman nga bunos ukon 13th month pay.
