KALIBO, Aklan—Sa pihak it ginapangatubang nga pandemya daea it COVID-19, may pilang mga job opportunities pa gihapon ro nagbukas para sa mga Filipino sa ibang nasyon.
Base sa datus it Aklan Public Employment Service Office (PESO), kaibahan sa mga nasyong nagbukas it oportunidad hay ro Japan nga nagakinahang-ean it mga care workers ag welder; Taiwan nga nagakinahang-ean it care taker samtang mga registered nurse ag cook mat-a sa Kingdom of Saudi Arabia (KSA) kamana man sa Hong Kong ag Singapore nga naga-usoy it mga household workers.
Suno kay Aklan PESO manager Ms. Vivian Ruiz-Solano nga padayun sandang nakikipag-angot sa mga lehitimong agency sa Metro Manila.
Sa kamatuoran suno kana hay nakalista sanda it kapin sa 24 nga mga aplikante apang ro an-om sa mga raya hay owa pa it passport.
Nagpanawagan man raya sa mga natungdan nga indibidwal nga kompletuhon eon ro mga ginakinahang-ean nga requirements ag dokumento agud makaeagas sanda sa interview.
Nakataeana suno kana nga mag-abot sa masunod nga dominggo ro representante maghalin sa sangka agency para magproseso it mga papeles ag magpatigayun it interview.
Pila sigon sa mga requirements nga dapat isumite sa andang opisina hay ro application letter, Brgy. Clearance, resume, picture, passport ag iba pang dokumento nga ginapangayo it paga-adtunan nga nasyon.
Gin-engganyo man kara ro iba pang interesado nga magdangop sa andang opisina ukon mag-apply online.
