KALIBO, Aklan—Sa tunga it nagahilapit nga Tokyo Olympics, amat-amat man nga nagatinaas ro kaso it Coronavirus Disease 2019 ukon COVID-19 sa Japan.
Suno kay Bombo International Correspondent Josel Palma it Yokohama, Japan nga maabo nga mga residente ro naga-apela nga uman nga ipaiway ro pagpatigayun it Olympics nga nakataeana nga mag-umpisa sa Hulyo 23 hasta Agosto 8, 2021.
Makaron nga adlaw sigon nakataeana nga istoryahan it Japanese parties kun pagabawasan ro 50 porsyento nga venue capacity ukon katumbas it 10,000 ka mga spectator nga nauna eon nga nakasugtanan it International Organizing Committee ag 2020 Tokyo Olpympics Organizing Committee.
Angot kara, ginpasiguro sigon ni Japanese Prime Minister Yoshihide Suga nga pagahimuon kara ro tanan agud nga masigurong eowas ro parehong atleta ag mga tumaean-aw.
Sa kamatuoran suno kana hay ginbisitahan eon it Prime Minister ro mga border it nasyon agud masigurong hugut nga maipatuman ro protocols.
Pila sigon sa mga preparasyon para sa nagahilapit nga olimpyada hay ro pagbutang sa mga magapasakop nga atleta sa athlete’s bubble kun sa siin may kanya-kanya sandang kwarto samtang magatinir man sa Olympic village ro mga coach, trainor ag official nga kaibahan sa torneo.
Mag-eowas kara, hugut man nga iga-obserba ro daywang metro nga distansya sa kada isaea, pagsuksok it face mask it mga tumaean-aw sa sueod it venue ag pagbawae sa pag-singgit ukon pag-cheer sa mga atleta agud nga malikawan ro pagkalhit it Coronavirus.
