MALAY, Aklan — Nagpaguwa it paandam ro Malay–Boracay Tourism Office para sa mga turistang nagapaagto sa Isla it Boracay bangud sa naga-inabu nga numero it mga bukon it rehistrado ag manugloko nga tourism operator nga nagatuga it peligro sa pinansiyal ag kaeowasan it mga bisita, eabi eon sa mga nagapa-book it serbisyo online.
Suno kay Kathrine Licerio, tagapaghambae it Malay–Boracay Tourism Office nga raya hay kadungan it pag-abu it mga report angot sa nakaka-engganyo nga online offers para sa mga tour, accomodation, transportasyon, ag mga package it aktibidad.
Maskin nga maabu sa mga tourism service provider sa isla ro accredited ag nagasunod sa mga sueundanan it gobyerno, apang ginpahayag it tourism office nga maka alarma ro pag abu it mga bukon it rehistradong operator nga ginapanipuslan ro mga online platform agud nga maka engganyo it mga bisita.
Nagpaandam ro mga opisyal nga may pilang website ag social media profile nga medyu lehitimo apang gindesinyo agud nga lokohon ro mga turista, gamit ro mga deceptive practices kapareho it sobra kataas nga presyo, saea nga representation it serbisyo, ukon owa pagtuman sa mga serbisyong ginbayaran eon.
Kaeabanan man sigon nga nabudlayan eon ro mga biktima nga mabawi ro andang kwarta bangud sa kakueangan it hugut nga pagbantay sa mga online nga transaksyon.
Agud nga malikawan nga mabiktima, gin engganyo it Boracay Tourism Office ro mga bisita nga siguraduhon nga ro tanan nga service provider—maging personal man o online ro pag-book hay accredited it DOT o opisyal nga rehistrado sa lokal nga gobyerno.
Ginlaygayan man ro mga turista nga mag usoy it balidong permit ukon gumamit it mga awtorisadong booking platform nga kilaea sa pagiging masaligan ag may maayos nga customer support.
