KALIBO, Aklan—Ginahueat pa it lokal nga gobyerno it Malay ro sabat it Aklan provincial inter-agency task force on Covid-19 partikular ni Governor Florencio Miraflores sa hinyo nga patag-uran ro oras it curfew sa isla it Boracay.
Suno kay Malay mayor Frolibar Bautista, kinahang-ean suno kana nga bawasan ro ginapatuman nga curfew sa isla agud nga maenjoy it mga bisita ro andang bakasyon kamana man mataw-an sanda it bastanteng tyempo nga makalibot sa isla.
Raya sigon nga tikang hay bilang pag-amat amat eon man sa uman nga pagbuhi it turismo maskin nga ro ginapasugtan pa eamang makaron nga makasueod sa isla hay ro mga taga-Western Visayas.
Aminado ro alkalde nga bukon pa it bastante ro revenue collection it munisipyo bangud sa pagsarado it mga establisyimento, kawad-an it turista ag iba pa tuga it pandemya.
Apang, eubus kara nga ginapasaeamatan nga nagapabilin nga Covid-free ro bilog nga isla.
Ginpahayag dugang nga halin ko July 1 hasta it 23 hay nakalista ro Malay Municipal Tourism Office it 357 ka mga turista nga nagbisita sa sikat nga isla.
Ginakabig kara nga senyales it uman nga pagpanumbalik sa sigla it turismo ro amat-amat nga pag-abo it mga turista nga nagabakasyon sa Boracay.
