KALIBO, Aklan–Bangud sa paeag it Omicron variant it COVID-19, kanselado sa gihapon sa ikaywang sunod nga dag-on ro tradisyunal nga merry-making ukon sadsad sa kalye sa paeaabuton nga selebrasyon it Kalibo Sto. Niño Ati-atihan Festival sa Enero 10 hasta 16, 2022.
Raya ro ginkumpirma ni Executive Assistant to the mayor Basil Tabernilla.
Suno kana nga nagpahaum sigon ro lokal nga gobyerno it kalibo it pilang mga events and activities, apang ginpaiway anay agud nga indi maging super-spreader event ro festival eabi pa ag nagtuhaw ro bag-ong variant nga ginasugid nga mas grabe pa kaysa sa delta variant.
Ro mga aktibidad suno kana it selebrasyon makaron nga dag-on hay magiging virtual nga iga-pattern nanda ko nagtaliwan nga dag-on agud nga malikawan ro uman nga pagtaas it kaso.
Ginpahayag pa ni Tabernilla ga indi malikawan nga dumugon it maabu nga mga tawo ro pagpatigayon it mga mabahoe nga event kapareho it mga nakasanayan.
Sa pihak kara, ginpahayag pa ni Tabernilla nga ginpasiguro it Ati-Atihan organizers nga makaangkon sa gihapon it pilang mga aktibidad agud nga mabatyagan ro kasadya it okasyon kapareho it food festival kamana man ro plant fair ag ati-atihan bazaar.
Samtang, may pagahiwaton sigon sanda nga “patik, battle of the ati-atihan bands”, apang virtual ag limitado eamang ro participants.
Apang uman sigon nanda raya nga paga-rebyuhon agud nga matumod kon aplikabli ag praktikal makaron nga tiempo.
Nauna eon nga nagpahayag it pagkabaeaka angot kara ro Provincial IATF kadungan ro pag-kwestiyon kon may bastanteng tawuhan nga magabantay sa pagpatuman it health and safety protocol.
Boses ni Mr. Basil Tabernilla
