Posibleng isabak sa anti- drug operation it Philippine National Police (PNP) ro mga tawuhan it Special Action Force (SAF).
Raya hay bangud nga bukas sa nasambit nga proposisyon si PNP chief Gen. Benjamin Acorda, Jr. sa tuyo nga matapna ro mga anomaliya sa sueod it PNP-Drug Enforcement Group (PDEG) sa andang mga drug-operations.
Naging kontrobersiyal ro PDEG matapos ro mabahoe nga drug operation kun sa siin nakumpiska ro kapin sa 900 kilo it shabu nga nagabalor it haeos P6.7 bilyon pesos.
Sa pihak nga mabahoe kunta nga kadaeag-an sa drug war it ahensya, naputos raya it kontrobersiya ag nagtuhaw pa ro anggulo nga cover-up.
Pilang mga mataas nga opisyal man ro nadaeahig.
Sa sunud-sunod nga atake, makabig nga nagnaba ro moral it maabung pulis.
Owa pa raya natapos bangud nga kon anu-ano pang mga proposisyon ro nagtuhaw sa makaron.
Gusto man sigon nga bungkagon ro special operations unit it PDEG sa bilog nga nasyon para malikawan nga uman nga maeakot ro sin-o man nga pulis sa isyu it ilegal nga droga.
Matsa bukon eamang sa pagbungkag it pilang units ukon pagbutang it dugang nga puwersa ro magiging sabat sa raya nga problema.
Kun may mga pasaway gid man, maskin siin nga unit pa magiging problema gihapon sa ulihi.
Suno man kay Acorda nga mabahoe ro anang kumpiyansa sa SAF trooper bangud sa andang kasanayan ag expertise pag-abot sa disiplina.
Dati eon man nga ginsabak ro SAF sa seguridad sa New Bilibid Prison kat mabutang man ro presuhan sa kontrobersiya sa isyu it iligal nga droga.
Kunsabagay, owa man it maduea kon paga testingan ro nasambit nga mga proposisyon kon para sa kamaeayran.
