KALIBO, Aklan—Sambilog sa waeo nga naging rason it pagkamatay sa Pilipinas hay ro sakit sa bato ukon kidney.
Suno kay Dr. Marymil T. Billones-Dignadice, head it hermodialysis unit it Dr. Rafael S. Tumbocon Memorial Hospital nga kada dag-on hay nagataas it kapin sa 10 to 15 percent ro numero it mga pasyenteng natamaan it sakit sa bato.
Makabig man sigon raya nga “ silent killer” nga klase it sakit bangud sa unang pagka-infect hay owa it may ginapakitang sintomas.
Base sa pagtuon 90 porsiyento it mga may sakit sa bato ro owa nagapakita it sintomas.
Natukiban man nga ro diabetes ro pinakarason it pagkaangkon it sakit sa bato.
Nasayuran nga ro mga sintomas it pagkaangkon it sakit sa bato hay ro grabe nga pagniwang, mapuea nga ihi nga medyo nagabuea, pagpanaeakit it likod ag pagpang-eapsi, kabudlay sa pagginhawa, pagkahilo, owa it gana magkaon, nagasuka, nabudlayan nga magkatueog ag nagapangatoe ro anang eawas.
Samtang sa pihak nga parte, gin-engganyo man ni Dr. Dignadice, ro mga pasyenteng may sakit sa bato ukon kidney nga magpabakuna kontra sa coronavirus disease.
Suno kana nga mas mabahoe ro tiyansa nga matapnan it covid-19 ro mga raya rason nga dapat hay mabakunahan agud may pambato ro andang eawas kontra sa deadly virus.
