KALIBO, Aklan—Nagapanguna sa gihapon sa mga rason it pagkamatay it sangka tawo hay ro sakit sa tagipusuon ukon heart disease.
Suno kay Dr. Michael Vic Beluso, sangka Internest-Cardiologist nga ro heart disease ukon coronary artery disease hay nagakahueugan it nagkaeain eain nga klase it sakit sa tagipusuon.
Ro heart disease hay daea it kondisyon nga ginatawag artherosclerosis nga nagaresulta sa pagpundo it pag-ilog it dugo sa tagipusuon.
Ginatawag man rayang cardiovascular disease bangud kaibahan raya sa kategorya it mga sakit sa cardiovascular system kapareho it atake sa tagipusuon ukon heart attack, irregular nga pagpitik it tagipusuon ukon palpitations, ag pagsakit it dughan ukon chest pain.
Ro mga sintomas it heart disease hay ro mga masunod; sakit it ueo, pagpanaeakit it dughan ukon chest pain, pagpang-euya, pagkahilo, paghinay ukon pagdasig it pitik it tagipusuon, pagpang-eupsi, ag nalisdan nga magginhawa.
Samtang ro mga rason man it heart disease hay ro mataas nga cholesterol, mataas nga blood sugar, ag sobrang stress ukon ro pagtago it kaeain it boot.
Agud nga malikawan ro nasambitan nga sakit dapat nga ubrahon ro mga masunod; likawan ro pagpanigarilyo, likawan ro stress, indi magkaon it mga makataeambok nga pagkaon, siguraduhon nga balanse ro pang adlaw-adlaw nga ginakaon, siguraduhon nga may pito hasta waeong oras nga tueg kada gabi-e, siguraduhon nga normal ro cholesterol level ag blood sugar, mag-ehersisyo, ag mag-inom it multivitamins.
