KLAIBO, Aklan–Naga-arangkada eon ro pilang aktibidad it mga eskwelahan para sa selebrasyon it World Teachers’ Day makaron nga adlaw it Miyerkules, Oktobre 5.
Suno kay Allan Relloto, Principal it Kalibo Pilot Elementary School nga opisyal nga nag-umpisa ro andang month-long celebration ko Setyembre 5 kung siin nagprepara sanda it pilang aktibidad para sa mga manugturo.
Kaibahan eon kara ro mga pahampang kada alas-4:30 it hapon kapareho it volleyball, basketball ag maabu nga iba pa.
Tuyo kara nga mataw-an it kahigayunan ro mga manugturo nga magkinasadya ag mabawasan ro stress tuga it maabu nga trabaho.
Natueopangdan man sigon nanda nga may pilang manugturo nga nabudlayan sa transition it presenteng pagtinueon-an.
Kaparte man sigon it selebrasyon ro pagpatigayun it culminating activity makaron nga adlaw bilang pagkilaea sa kahugod ag sakripisyo it kada manugturo eabi eon sa pagpaumwad it kasayuran it mga estudyante ag pagbulig sa mga aktibidad it gobyerno.
