KALIBO, Aklan — Nagapadayun ro imbestigasyon it pulisya sa kabangdanan it pagkamatay it sangka sales supervisor nga nasapwan nga owa eon it kabuhi sa balkonahe it gindayunan nga lodging house sa Roxas Avenue Extention, Andagao, Kalibo, Aklan.
Nakilaea ro biktimang si Daymon Prieto, 47, residente it City Proper, Iloilo City.
Suno sa kaibahan it biktima nga si alyas Oscar, owa eagi nanda natapos ro ginahimo nga inventory it andang mga produkto kahapon rason nga nagdesisyon nga mag-overnight sa nasambit nga lodging house.
Mag-eowas kara, kahapon pa eamang hay nagreklamo eon sigon kana si Prieto nga medyu maeain ro anang pamatyag.
Sa pihak nga parte, naboe-an it CCTV camera, pasado alas-12:00 kabi-i ro medyu paggutok it dughan it biktima nga nagapabalik-balik sa pagtikang samtang may kaistorya sa cellphone hasta nga eubusan nga natumba sa saeog.
Mabahoe ro pagpati it pulisya nga owa it foul play sa insidente ag posibleng inatake raya sa anang sakit sa tagipusuon.
Presenteng nagapadayun ro imbestigasyon it pulisya ag SOCO-Aklan sa hitabu nga kon sa siin hay gina-rekomendar nga ipaidaeum sa autopsy ro bangkay it biktima agud nga matumod ro matuod-tuod nga kabangdanan it anang pagkamatay.
