KALIBO, Aklan–Naga-apela makaron ro mga pumueoyo ag opisyal it barangay Bacan, Banga sa mga natungdan nga ahensya it gobyerno nga mataw-an it nagakaigo nga solusyon ro perming pagkasamad it andang provincial road.
Suno kay Punong Barangay Allen Robelo nga maabu eon nga mga motorista ro nadisgrasya sa nasambit nga lugar tuga it samad nga karsada.
Masyado sigon nga delikado ro mga giltak kung siin makit-an pa ro pag-alsa it semento.
Nagpanawagan man raya sa Provincial Engineering Office (PEO) ag Department of Public Works and Highways (DPWH)-Aklan nga maaksyunan ro andang karsada ag mataw-an it long-term solution.
Samtang, plano man it opisyal nga mag-ubra it formal complain ukon sueat sa gobyerno probinsyal para ipaabot ro andang problema.
Sa pihak nga parte, ginsuhestiyon man ni Kapitan Robelo nga dapat mabutangan it weighing bridge ro nasambit nga karsada para masukat ro karga nga baeas it mga naga-agi nga truck.
Nagakadapat eamang suno kana nga ma-regulate ro pag-agi it mga daeagkuan nga trucking bangud ginapatihan nga sambilog ro mga overloaded nga behikulo sa rason it madasig nga pagkasamad it karsada.
