KALIBO, Aklan—Gintalakay sa ginpatigayun nga session it Sangguniang Bayan it Kalibo ro mga concern angot sa samad nga traffic light sa pilang daeanon sa banwa it Kalibo.
Ginkasugtanan it mga miyembro it konseho nga magpasa it sangka resolution para mag-request sa Department of Public Works and Highways (DPWH)-Aklan it repair sa mga samad nga traffic lights.
Partikular nga gintumod it mga opisyal ro traffic light sa bahin it F. Quimpo Street Corner Mabini Street, Roxas Avenue Corner Toting Reyes Street ag Sitio Karumahan, Brgy. Bakhaw Norte, Kalibo.
Mabahoe sigon ro epekto kara sa daeagan it trapiko bangud masami nga bukon it organisado ro mga naga-agi nga saeakyan halin sa mga kalye.
Dapat sigon nga mataw-an raya it insigida nga aksyon agud nga indi makaangkon it sab-eag sa mga motorista.
Sa pihak nga parte, nagpasa it sangka resolution si Sangguniang Bayan member Augusto Tolentino para taw-an it patas nga pagtratar ro mga miyembro it Lesbian, Gay, Bisexual, Transgender, and Questioning (LGBTQ+) Community.
Suno kana, mabahoe ro kontribusyon it grupo sa komunidad kung siin nagakadapat eamang sanda nga taw-an it nagakaigo nga respito ag proteksyon.
Ginproponer man kara nga maging kaparte sanda it development ag entrepreneurship sa banwa it Kalibo.
