KALIBO, Aklan—Sambilog pang empleyado it Barangay hall it Poblacion, Kalibo ro nagpositibo sa Coronavirus Disease ukon COVID-19.
Suno kay Punong Barangay Niel Candelario nga ro panibag-ong nagpositibo hay natapnan sa sambilog pa nanda nga empleyado nga nauna eon nga nagkasakit nga sangka miyembro it Barangay Peacekeeping Team ag Barangay Health and Emergency Response Team (BHERT).
Naka-assign sigon raya sa andang information and technology ukon IT department.
Imaw eamang sigon ro nagpositibo sa mga empleyado nga ginpaidaeum sa swab test ko nagtaliwan nga adlaw.
Ginpahayag dugang nga nagapabilin sanda nga naka-self isolate kaibahan ro iba pang nakasalamuha it panibag-ong covid positive nga gindaea eon sa quarantine facility it LGU-kalibo.
Ginpahayag pa ni kapitan Candelario nga gin-abisuhan man nanda ro iba pang nakaangkon it close contact sa pasyente nga mag-self isolate sa sueod it 14 diyas.
Apektado eon suno kana kara ro andang operasyon bangud nga haeos tatlong adlaw eon nga naka-lockdown ro andang barangay hall ag puro online transaction ro andang ginahimo.
Apang posible suno kana sa lunes hay makabalik eon ro andang operasyon matapos nga maka-usoy it masayluhan bangud ro andang edipisyo hay uman nga igapaidaeum sa decontamination.
Madumduman nga ko Martes it agahon, Oktubre 13 hay temporaryong ginsarado ro andang taeatapan agud nga mataw-an it daean ro nagakaigo nga sanitation ag disinfection para sa kamaeayran it andang mga empleyado ag mga kliyente ag indi eon magkalhit ro virus.
Nasayuran nga pati ro misis it nauna nanda nga empleyado nga nagpositibo sa deadly virus hay natapnan man, apang sa makaron hay una eon sa mayad nga kahimtangan.
