KALIBO, Aklan — Sambilog pang illegal pipes ro natukiban nga naga release it maitom ag mabahong tubi maeapit sa baybayon sa Sitio Pinaungon, Brgy. Balabag sa isla it Boracay.
Suno kay Atty. Richard Fabila, OIC it CENRO-Boracay nga sangka naga jogging nga residente ro nagpaabot kanda it impormasyon may kaangtanan sa maka-dueodang lugar nga gina hugom ag pilit nga gina kutkot it mga ayam.
Sa bulig it backhoe it Provincial Engineering Office (PEO), gin kutkot ro lugar ag nakita nanda ro illegal nga pipe nga ro maitom ag mabahong tubi hay naga derecho sa tubi-dagat.
Ro lugar kun siin nadiskubre ro panibag-ong tubo hay maeapit eamang sa sambilog pang gin eubong nga tubo sa Sitio Manggayad sa nasambitan nga barangay.
Sa pihak nga parte, nagpamalibad anay si Atty. Fabila nga magtao it pangaean it mga establisimentong maeapit sa tubo.
Naga padayun sigon ro andang tracing sa pagtumod kun sin-o ro mga nakakabit kara.
Nagapati ro CENRO-Boracay nga maabo pa sandang matukiban nga mga illegal pipes sa maabot nga mga inadlaw samtang naga padayun ro rehabilitation works sa isla.
Gin kalipay man kara ro gina pakitang kooperasyon it mga pumueoyo pinaagi sa pagturo it gina hamtangan it mga illegal nga tubo nga gin eubong sa lugar sa mabuhay eon nga paniempuhon.
